Un grupo de persoeiros da cultura apresentaron hoxe un manifesto promovido por A Mesa pola Normalización Lingüística, co que se pretende dar resposta á "inversión da realidade" que sobre o idioma están a facer algúns colectivos dende Madrid.

Contan en Vieiros que na presentación estiveron presentes coñecidos persoeiros de diferentes ámbitos da sociedade galega. Esta iniciativa sumase á acción conxunta da Federación Galeusca, apresentada recentemente.

Reproduzo a continuación o texto completo do manifesto d'A Mesa, ao que por suposto xa me adherín, e aos que vos convido a facer o mesmo:

 MANIFESTO A PROL DA CONVIVENCIA LINGÜÍSTICA E DA IGUALDADE DE DEREITOS PARA O GALEGO

As persoas que promovemos esta chamada queremos manifestar, perante as institucións de autogoberno e como aclaración perante a sociedade galega, o seguinte:

1.- O pobo galego ten dereito a que a súa lingua propia (orixinaria) sexa oficial a todos os efectos no seu ámbito territorial. Os usuarios do galego deben desfrutar no seu territorio do mesmo status legal que o castelán ten no seu.

2.- A situación do galego está moi lonxe de ser así. Non desfrutamos de dereitos lingüísticos plenos para desenvolver a nosa vida diaria con normalidade na nosa lingua na nosa terra. Son os falantes do galego os que resultan discriminados. É o galego o que corre perigo como idioma e os galego falantes os que non son debidamente respectados. Vivimos unha grande inxustiza que é a negación da igualdade e da verdadeira convivencia.

3.- Por iso, resulta realmente preocupante que, desde Madrid, con apoio de importantes medios de comunicación, haxa quen pretenda convencer á opinión pública de que o castelán corre perigo de desaparición e que os seus falantes son discriminados no noso país. Esta inversión da realidade ten como obxectivo que os falantes do galego non teñan dereitos lingüísticos e que os únicos deberes para as Administracións públicas se vinculen ao castelán.

4.- O verdadeiro problema non está na cooficialidade de idiomas como o galego, senón na actitude de quen nega a existencia de pobos e linguas diferentes no Estado español. Esta actitude si é a negación da convivencia e da igualdade. O proceso de normalización de usos do galego foi lento e, até hoxe, insuficiente para garantir o dereito a vivir nesta lingua. O que compre é respectar a legalidade vixente (Estatuto e Lei de Normalización Lingüística) e avanzar con cambios legais na dirección da igualdade e da convivencia. Xustamente a dirección contraria á proposta polos que pretenden a imposición do castelán como único idioma con dereitos e deberes para os cidadáns en todo o territorio do Estado.

5.- Correspóndelle ao pobo galego, a través das súas institucións representantivas, definir a política lingüística acorde co criterio de cooficialidade e de lingua propia que mesmo o actual Estatuto recoñece para o noso idioma. Esperamos o compromiso das institucións de autogoberno na defensa da igualdade plena de dereitos para o galego e na aplicación de medidas a favor da normalización dos seus usos. Neste labor contarán sempre co noso apoio.

6.- Alertamos á sociedade galega para non se deixar confundir e instámola a cavilar sobre a verdadeira situación do galego no propio país.

Defendemos un dereito humano elemental que nos define, ademais, como pobo diferenciado. Debemos ser firmes rexeitando todo posicionamento que persiga recortar dereitos ou retroceder no cativo camiño andado tanto nas administracións públicas, como na vida social.

ADHÍRETE AO MANIFESTO

chúzame

Máis aló da democracia "formal", non pode existir unha xenuina democracia real sen unha activa participación sociopolítica. Superar o carácter "representativo" a través de canles de participación directa da cidadanía é o grande repto, se cadra un dos pasos chave nun proceso de verdadeiramente revolucionario.

O papel da cidadanía debe afastarse da dimensión reducida de electores para achegarse á semántica orixinal da democracia.

As persoas deben deixar de ser actores pasivos que só interveñen periodicamente en procesos electorais que ás máis das veces pola súa propia configuración normativa non son democráticos (leis electorais que impiden de facto a representación plural das minorías, maquinaria do mass media ao servizo de determinadas opcións, listas pechadas, modelo de circunscricións...), para converterse en actores protagonistas da vida política. Esa é a verdadeira democracia.

As novas tecnoloxías da información teñen grandes potencialidades como canles útis no propósito de reinvertar a democracia en chave participativa. Polas súas características (accesibilidade, ruputra de fronteiras físicas, interconexión...) a denominada web 2.0 con todos os elementos que a compoñen (redes sociais, blogues, espazos de realidade virtual, streaming...) está a converterse na palestra do século XXI.

Así as infotecnoloxías xa están a sustituir aos pasquíns e aos mitíns nas fábricas do século XIX, con campañas de ciberactivismo de masas, ciberconvocatorias (coa súa versión SMS)... con debates no Youtube, achegando un elemento enriquecedor como é o da colectivización da participación política respetando os espazos da iniciativa individual como desencadenante.

Como sostén Eladio Díez, responsábel do Foro de Investigación e Acción Participativa, nunha interesante entrevista publicada hoxe en Vieiros, "o ciberactivismo é a resposta desde a base a este novo mundo".

_Artigos de interese:

• Entrevista a Eladio Díez (FIAP) en Vieiros.
• Democracia participativa e integral camino al nuevo socialismo - Narciso Isa Conde (Rebelión)
• ¿Si la democracia participativa es la respuesta, cuál es la pregunta? - Joan Subirats (Rebelión)
• Tecnologías de la Información y Comunicación (TIC) y Democracia - Vicente Romero (Rebelión)

_Ligazóns:

• Instituto para el Desarrollo de la Democracia Participativa
• ParticipatoryDemocracy.net
• Artigo sobre  a Democracia Participativa na Wikipedia.
• Rede Estatal de Municipios con Orzamentos Participativos.
• Foro Social Galego.

_Descargas relacionadas:

• Documento "Que é o Orzamento Participativo?" da Fundación Galiza Sempre.

chúzame

MANIFESTO "REDE POLA DIVERSIDADE FAMILIAR"

Os asinantes deste manifesto concibimos a rede como unha fonte de información e entretemento, pero tamén de activismo e participación social. Desde a disparidade ideolóxica, relixiosa, racial e sexual únenos o noso compromiso coa igualdade e a diversidade. Por iso, reafirmamos o noso compromiso co respecto e a tolerancia cara os distintos modelos familiares. Os tempos cambiaron e o modelo tradicional de familia convive hoxe con outros tipos, como as familias monoparentais ou homoparentais. Entendemos que esta diversidade enriquece notabelmente a nosa sociedade e, con tristeza, vemos día tras día como algúns sectores conservadores e retrógrados, encabezados polas xerarquías eclesiásticas, tentan impoñer un modelo excluinte de familia tradicional. Por todo iso expresamos:

- O noso máis firme REXEITAMENTO ás actitudes de exclusión e discriminación que algúns sectores conservadores, liderados pola Igrexa católica, mostran cara os distintos modelos familiares que conviven hoxe na nosa sociedade. Consideramos que detrás da súa enfática defensa do modelo de familia "tradicional" agóchase a intransixencia e o odio á diferenza. Defendemos a diversidade como un trazo enriquecedor, tamén no ámbito familiar, e, por iso, esiximos respecto e tolerancia para todos e cada un dos modelos de familia existentes.

- A nosa sólida DEFENSA da igualdade e a diversidade, e polo tanto, do dereito de todo cidadán, sen importar a súa orientación sexual, a amar, contraer matrimonio e construír a súa familia libremente. Actualmente na nosa sociedade existen distintos tipos de modelos familiares e todos deben gozar do mesmo respecto e consideración cos mesmos dereitos e obrigas.

Para rematar chamamos á MOBILIZACIÓN social para seguir avanzando en igualdade e construír unha sociedade máis libre, igualitaria e diversa. Só coa participación e a visibilidade será posíbel frear as actitudes discriminatorias, intolerantes e intransixentes que seguen existindo e condenando a diferenza.

TODAS AS FAMILIAS IMPORTAN
SI Á DIVERSIDADE FAMILIAR

Asina AQUÍ

Promove: Rede pola Diversidade Familiar.

chúzame