Un dos maiores empeños do BNG de sempre, e que se ten concretizado en numerosas medidas levadas a termo dende Vicepresidencia, ten sido o de rachar coa visión asistencialista que converte aos servizos sociais nunha caste de acción caritativa da administración pública, para situalos onde deben estar: no lugar que ocupan outros dereitos irrenunciábeis como a sanidade, o ensino, o traballo digno ou a vivenda.

Cando se produce un cambio político tan significativo como o resultante da derrota de Fraga e a entrada do nacionalismo no goberno galego, un dos maiores reptos é o de asegurar que todos os pasos que se dean se desprendan de calquer viso de temporalidade. Os avanzos deben consolidarse como pasos sobre os que ninguén poida desandar. Nese senso, a axenda lexislativa do goberno, os proxectos de lei, son a principal ferramenta.

O proxecto de lei de Servizos Sociais que se está a debater no Parlamento Galego, sintetízase nun concepto tan revolucionario como o de proclamar o dereito universal de acceso aos servizos sociais, protexido e amparado nun marco normativo e instrumental.

Coa aprobación dese proxecto de lei, as/os galegas/os saberemos que temos dereito por lei a uns servizos fundamentais para construír unha sociedade máis equitativa e xusta. Xa non será a esmola asistencialista do pasado, senón un dereito con rango de lei.

A achega do Partido Popular a este proxecto demostra cal é o seu verdadeiro interese nesta cuestión. O único que fixo foi propor unha emenda á totalidade pedindo a devolución do proxecto. Emenda que foi rexeitada.

chúzame

Parte do discurso politicamente correcto da progresía é unha teima estética, no significante, no discursivo, en favor da muller.

Inda que iso se quedase aí, na mera declaración de intencións, xa sería un importante paso en favor da metade da nosa sociedade, xa que cando menos favorece a visibilización das problemáticas de xénero e socializan o valor da igualdade como un elemento indiscutíbel.

Pero gañada a batalla das ideas, dos discursos, precisase de moito máis. É imprescindíbel coñecer a realidade e denunciar as inxustizas, pero só coñecéndoa esta non muda. Son necesarias medidas concretas, accións específicas. Converter as palabras en feitos.

Estes últimos anos a acción de goberno do BNG na Xunta foi quen de facer que as políticas en favor das galegas teñan dado un salto substancial, no cuantitativo pero tamén no cualitativo. Porque o BNG actúa en favor das mulleres, non por pose electoral senón por puro convencemento. O convencemento de que é hora de rachar dunha vez por todas a tiránica desigualdade que impón o patriarcado.

A relación de iniciativas é moi longa, dende o salario da liberdade até as infraestruturas (galescolas, centros de día) que posibilitan algo tan fundamental, pero tan pouco habitual, como que as mulleres teñan tempo de seu para si mesmas.

Pensar nas nosas nais, e nas nosas avoas, pero tamén nas mulleres que sendo menores de 40 anos inda hoxe teñen serios problemas para conquistar un mínimo de conciliación entre a súa cota de vida familiar e a profesional, serve para constarmos os pasos que inda nos faltan por dar.

O que fica claro é o do BNG é un compromiso efectivo coas mulleres.

TEMPOS DE MULLERES

MULLERES QUE FALAN DE QUIN

chúzame

Hoxe ven de nacer no seo da rede social Facebook, o grupo de apoiantes do Bloque Nacionalista Galego: Adiante BNG!

O enderezo do grupo é o seguinte: http://www.new.facebook.com/group.php?gid=27312002310

Se tes perfil en Facebook e acreditas no BNG como a forza política que pode e vai transformar o noso país, adhírete ao grupo.

Como pai da criatura hei de recoñecer que o humilde obxectivo desta iniciativa non é outro que o de aproveitar as posibilidades que ofrecen redes sociais como Facebook, para facer visíbel e espallar a presenza do nacionalismo na Rede.

O nacionalismo galego debe deixar de ficar alleo ao que se está a cocer na web 2.0, xa que está a infrautilizar as súas potencialidades como ferramenta política. As mesmas que as forzas políticas sistémicas, PSOE e PP, si están a usar en maior ou menor medida e con diferentes níveis de éxito.

A internet é a multicopista do século XXI, coa vantaxe engadida da interactividade, entre outras.

chúzame

O videoblogue de Anxo Quintana ofrecenos desta volta un divertido vídeo no que falan seareiras e seareiros do Deportivo.

A pregunta que fai de leitmotiv é a de se o actual Portavoz Nacional do BNG (e Vicepresidente da Xunta), que polo momento o único pre-candidato que optará a ser candidato do BNG nos vindeiros comicios autonómicos, podería ser Presidente do Goberno Galego.

A resposta que máis me gostou foi a de "Elo... porque non?"

Efectivamente, se algo deixaron claro estos tres anos de goberno bipartito, é que as cousas terían sido ben distintas se a Xunta estivese presidida por un nacionalista.

chúzame

A organización xuvenil do BNG, Galiza Nova, que neste 2008 cumpre o seu vinte aniversario, organiza como cada ano as súas tradicionais Xornadas de Verán, que se van celebrar na Comarca de Pontevedra, os próximos días 19, 20 e 21 de setembro (esta fin de semana).

As Xornadas de Verán son un evento moi atractivo para toda a xente moza, sexa militante ou non de GN, xa que inclúen charlas, actividades de lecer e deportivas, convivio... nun programa moi completo e ameno.

A cota de inscrición son 15€ que inclúen as comidas, desprazamentos e durmida dos tres días. Para anotarse tan só é preciso enviar un correo electrónico a nacional@galizanova.org

As persoas que inda ficando interesadas non poidades participar de todas as Xornadas, podedes acudir a calquera dos actos de maneira separada.

Animádevos!

• Descarga o programa completo das XX xornadas de verán. (PDF)
  

+ Información en www.galizanova.org

chúzame

Unha das poucas cousas que non se pode facer en campaña electoral, polo barullo ao que fican sometidas, e pola voráxine mediática que dita o timing, é explicar polo miúdo, con sosego e claridade, o traballo feito por cada unha das forzas políticas, destacadamente as que asumiron tarefas de goberno, pero tamén as que tiñan o cometido de facer oposición.

O repto que teñen/temos as forzas políticas perante a cidadanía nun proceso preelectoral é o de convencela. E convencer, convencese demostrando o feito, facendo visíbeis os cambios producidos, poñendo enriba da mesa, inda que sexa nunha síntese excesivamente simple, o traballo que se desenvolveu nestes últimos anos.

Unha das seccións máis interesantes do videoblogue de Anxo Quintana, a Quin TV, é a titulada "Transformando Galiza" na que se van ir presentando, en diferentes vídeos, os eixos das políticas impulsadas polo Bloque Nacionalista Galego, nas áreas que dirixe na Xunta de Galiza.

Dende logo o BNG pode ter cometido erros, ou incorrer en insuficiencias, na súa acción de goberno, pero o que ninguén pode reprochar é que non teña feito política de país ao servizo da maioría social, isto é, da clase traballadora.

Déixovos dous vídeos onde se explican dúas iniciativas moi importantes como son o Plano Sectorial de Solo Residencial, impulsado por Vivenda, e o revolucionario Banco de Terras, de Medio Rural.

chúzame

Fronte as explicacións metafísicas ou filosóficas, arredor da necesidade de máis autogoverno para o noso páis, é fundamental que o nacionalismo argumente con meridiana claridade, na linguaxe común, exemplificando na realidade cotiá que viven as galegas e os galegos.

Deixovos aquí a resposta  de Anxo Quintana, vía Quin TV.

Poderase dicer de mil maneiras distintas pero é dificil dicilo máis claro.

chúzame

Como sabedes o videoblogue do portavoz nacional do BNG, e Vicepresidente do Governo Galego, Anxo Quintana, xa foi lanzado trala súa apresentación pública.

Antes entrar en materia, teño que destacar o excepcional traballo feito pola xente de A Navalla Suíza no desenvolvemento de Quin TV, un equipo de profisionais conformado polo mellor da Rede galega (Berto, Xabier Cid, María Yañez...). O formato é moi actual e atractivo, e un intúe que detrás dese aspecto tan funcional e sinxelo de navegar hai traballo arreo.

As múltiples funcionalidades da Quin TV (compartir vídeos, descarga directa, comentarios, avatar personalizábel para usuarias/os, e vídeo en HD...) deixan claro que o continente é do mellorciño.

A respecto dos contidos, pese a que coido que teñen unha clara vocación de "culto á persoa" da que non gosto en absoluto, hai algún vídeo interesante. A posibilidade de participar a través de comentarios é un aspecto para min moi positivo. Agardemos que non agromen os trolls que pululan pola rede galega...

Non podo calar, e teño que dicer que o aspecto que máis me desgusta é a falta de oportunidade temporal no lanzamento desta plataforma multimedia.

Cando ficamos ás portas dun proceso asemblear que terá que escoller a/o vindeira/o candidata/o do BNG á Presidencia da Xunta de Galiza, e cando algúns sectores ameazan con boicotar a Asemblea Nacional Extraordinaria parapetados na máis cutre demagoxia, non é de recibo apresentar un meio que ten unha clara vocación electoral con tanta anterioridade.

Ás veces ser escrupulosos neste tipo de cousas non está de máis.

chúzame

Mañá 6 de setembro parece ser a data na que se lanzará unha nova canle de TV por Internet, impulsada polo BNG, da que se descoñecen inda que tipo de contidos. A promoción mediante banners publicitarios en diversos meios dixitais, suscitou algúns ruxe-ruxe.

A Quin TV xa ten o seu primeiro vídeo, no que anuncia que nela se verán todas as caras de Anxo Quintana.

Non entendo moito cal pode ser o obxectivo desta nova plataforma multimedia, tendo en conta que até a decisión da Asemblea Nacional Extraordinaria do BNG, que se celebrará o vindeiro 5 de outubro, non está eleita/o a candidata/o á Presidencia da Xunta...

Mañá a estrea.

chúzame