CONTRADISCURSO

Lembro que un dos primeiros artigos que publiquei en prensa, senón mesmamente o primeiro, titularao "Política é convencer". Naquel texto breve que viu a luz no quincenario A Peneira, que acaba de cumprir 500 exemplares ao servizo do país, reflexionaba a respecto do papel central que ten a conciencia no proceso político, e de que polo tanto, convencer para sumar debía ser a máxima de todo proxecto con aspiración de ser hexemónico socialmente.

Tirando algo máis do fío desa aseveración, se cadra excesivamente simple mais acaída, un conclúe que a comunicación é en consecuencia un ámbito central do traballo político. A batalla das ideas, indispensábel para crear conciencia e acumular forzas na construción dunha maioría social, dáse en boa medida coas ferramentas comunicativas das que dispoñamos.

É evidente que o PSOE está a pegar un brusco golpe de temón no relativo ás súas propostas políticas, nomeadamente no que ten que ver coa saída da crise. Pode que definir ese feito como un xiro á dereita, como denunciaba recentemente o portavoz do BNG no Parlamento do Estado, sexa un eufemismo excesivamente xeneroso cun goberno que está a aplicar sen rubor as receitas do mesmo neoliberalismo que provocou a actual crise.

O que Zapatero presaxiaba como un breve episodio de dificultades converteuse co paso dos meses nunha crise en toda regra, que puxo en evidencia as debilidades dun modelo económico creado con base no paradigma ultraliberal en función dos intereses das principais potencias dominantes da zona euro (Francia, Alemaña?). As mesmas que converteron o Estado español nunha área fundamentalmente de servizos, nun mercado consumidor de importacións, e no que curiosamente a única industria en alza era un sector ligado á especulación financeira coma o da construción inmobiliaria, após ter desarticulado os principais sectores produtivos -como quedou patente en Galiza coa falsa reconversión do naval ou a cota láctea-.

Estas últimas semanas deuse unha paradóxica, e se cadra mesmo oportuna, coincidencia. Ademais da falta de tempo para escribir novos artigos e columnas, fundamentalmente por mor da carga de traballo e do lanzamento da revista dixital Pensar e Axer, sumaronse unha serie de eivas de carácter técnico. Como puidechedes comprobar o blogue estivo varios días inaccesíbel, e outros moitos días faltaban contidos e/ou a apariencia mudara temporalmente.

Superada esa incidencia, coa axuda sempre eficiente de Goretoxo (o admin de Blogaliza, onde fica aloxado este blogue), nos próximos días irei reanudando o ritmo "normal" na escrita e na actualización da bitácora.

Sei que non hai por que dalas, mais de todos os xeitos grazas pola paciencia e polas vosas visitas.

Quen cualifica o actual goberno da Xunta de Galiza de empresa de demolición, dende logo non esaxera o máis mínimo. A ausencia de impulso político, de iniciativas, a patente falta de respostas e solucións ás principais problemáticas que está a sufrir o noso país é a principal característica do executivo presidido por un Núñez Feijóo, máis preocupado por gañar o favor e a graza da dereita española que de exercer as súas responsabilidades de goberno.

Hai infinidade de exemplos desta acción destrutora, que nada achega a favor do benestar do noso pobo. Porén, a clara tentativa de desmantelar os servizos sociais básicos, primeiro a través da súa privatización, é probabelmente un dos máis dramáticos. O Consorcio Galego do Benestar, que foi sen dúbida un dos maiores avanzos conseguidos durante o Goberno bipartito, e un mérito específico da ala nacionalista daquel goberno, é un dos principais obxectivos da acción demoledora do PP. Por que? Polo simple feito, non menor, de que representa a elevación a dereito fundamental o acceso a servizos sociais tan elementais para o noso país, como as galescolas hoxe convertidas en galiñeiros españolistas, os centros de día ou as oficinas I+B.

Onte botou a andar un proxecto divulgativo da Asociación Cultural "Guieiro", a Revista Dixital de Pensamento Marxista e Nacionalista Galego "Pensar e Axer", que teño o pracer -e a responsabilidade- de dirixir. No seu Manifesto Editorial, explicamos as causas que a motivan e os seus obxectivos.

Tanto Vieiros coma GZ Nación recolleron o nacemento. Este último medio ademais entrevistoume.